Prefacio
Meta - Vision - Mision
Miembro di Directiva
Yamabo bonbini y bo por haya tur tipo di informacion di CBPP pero tambe abo lo por aserca directiva pa idea y pa bira boluntario.
Habitante di bario y yui di bario Lo bo no kier biba den un bario sano y harmonioso unda tur habitante ta contento y dispuesto pa yuda otro. Esey por den bo bario si bo ta dispuesto di yuda tambe. Bo bario por haci bon uso di bo potencial.
Gobierno ta bini y gobierno ta bai pero nos como habitante lo keda semper y pesey nos tin e posibilidad pa haci nos bienestar den bario duradero.
Centro di Batrio kier duna oportunidad na tur habitante y yui di habitante pa realisa nan deseo. Nos ta haci esey dor di ofrece tur tipo di actividad social cultural deportivo y educativo. Tambe nos ta haya importante pa pone atenciaon specifico na nos grandianan y personanan special.
Presidente, Dennis Burke
Meta di CBPP:
Centro di Bario Playa Pabao ta un fundacion lanta na 1978 y tin como meta pa promove e desaroyo spiritual, social y físico di e habitantenan den e bario di Playa Pabao y Besindario den un forma no politico y no confesional. E centro ta trata pa realisa e metanan di e fundacion dor di (laga) organisa actividad, social, cultural, educativo, deportivo.
Vision - Mision:
Nos vision ta cu habitantenan den bario di Playa Pabao y Besindario ta solidario cu otro y a base di esey ta experiencia un calidad halto di bida pa un y tur.
Nos mision ta pa ofrece habitantenan di Aruba y en particular di Playa Pabao y Besindario, actividadnan tanto educativo como deleitativo cu e meta general pa promove e cooperacion den bario y capasitanan pa asina funciona optimal den nos comunidad.
Miembro di directiva actual:
Presidente Dennis Burke
Secretario Edwin Martinus
Tesorera Angeline Geerman-Giel
Comisario Rita Thomas
Historia di e miembronan di CBPP:
Fundacion Centro di Bario Playa Pabao a ser lanta riba 24 di februari 1978. Sr. Edgar (Watty) Vos q.e.p.d. a tuma e iniciativa di forma e prome directiva y a funda nos fundacion. Sr Luisito Vingal a fungi como e prome presidente di directiva di nos Centro. Na 1981 despues cu OSTICEBA (un fundacion pa duna sosten profesional na e centronan di bario) a pone un trahador di bario disponibel y a amplia directiva cu tres miembro a cuminsa promove e actividadnan di CBPP den e bario di Playa Pabao. Centro di Bario no tawatin un edificio y tawata reuni na oficina di Osticeba na Dakota. Danki na sr. Edgar Boekhoudt, cabesante di Sint Franciscus College, directiva di CBPP pronto por a haci uso di un local den e scol. Directiva a lanta diferente comision e.o. comision: di hubentud, di damas, di deporte, di revista Canoa. E actividanan di e tempo ey tabata entre otro anochi di cine, seso-sport, torneo di futbol, diferente charla, paseo cu nos grandinan, celebracion di dia di mama, anochi cultural, anochi di información y hopi mas.
Directiva a haña su mes cu un trabou duro pero e actividadnan riba tereno social, cultural, deportivo y educativo tawata un necesidad grandi den e bario. E cooperación y participación di e habitantenan den e bario tawata asina grandi cu Directiva a experiencia e trabao di pionero aunque duro relativamente facil, Unda Centro di Bario a pidi ayudo e’la hañ’e. Directiva di Centro Semper a keda e motor tras di e programa di actividad. Danki na e diferente directivanan cu Centro di Bario Playa Pabao a conoce nos orgtanisacion por a realisa un programa dinamico y un edificio cu diferente facilidadnan cu ta haci e realización di e programa di actividad pa e bario posible. No solamente directivanan pero tambe tur e comicionnan cu te awe ta consisti di boluntario a pone nan oranan liber trahando na e bienestar di nos bario. Fuera di e boluntarionan di Playa Pabao mester mmenciona e aporte grandi di organisacionnan priva y instancianan gubernamental entre otro OSTICEBA, CEDE-ARUBA, ATHA, UNOCA, Landsloterij y Lotto pa Deporte Lotto pa Deporte y Aruba Way Foundation, Departamento di Asunto Social, Departamento Obras Publico, IDEFRE, Instituto di Cultura y e diferente gobiernonan cu pa medio di subsidio a haci posibel cu CBPP por haña diferente medionan necesario y por a realisa actividadnan social cu gastonan halto.
About Us /Un tiki informacion di nos
